Президент жатак-мектептеринин бүтүрүүчүлөрү менен жолугушту

Бүгүн, 1-июнда өлкө башчы Садыр Жапаров ата-энесинин камкордугунан ажыраган, интернат тибиндеги балдар мекемелердин бүтүрүүчүлөрүнүн жашоо шарттары менен таанышты. Бул тууралуу президенттин администрациясы кабарлады.

Маалымдалгандай, Бишкекте Мамлекеттик ипотекалык компаниянын турак жай фондунун базасында толугу менен мамлекеттик камкордукта болгон тоголок жетимдер үчүн убактылуу жашоо уюштурулган. Алар окуу жайлардын жатаканаларынан чыгарылгандан кийин аталган жайларда башпаанек ала алышат. Батирлер балдарга жана кыздарга арналган эки блоктон турат.

"Учурда бул жайда 16 жаштан 18 жашка чейинки 25 бүтүрүүчү (10 жигит жана 15 кыз) жашайт. Алар Бишкек шаарындагы, ошондой эле Чүй, Ысык-Көл жана Ош облустарындагы мектеп-интернаттардын жана кесиптик лицейлердин бүтүрүүчүлөрү болуп саналат", - деп айтылат маалыматта.

Президент турак жайларды көрүп чыгып, жаштардын жашоо тиричилик шарттары менен таанышып, алар менен баарлашты. Ошондой эле алардын билим алуу жана келечектеги кесиптик пландары тууралуу сүйлөшкөн.