“Бала ырысы” жөлөк пулуна арыздарды кабыл алуу качан башталары айтылды

1-июлдан тарта Кыргызстанда үч жашка чейинки балдары бар үй-бүлөлөр үчүн жаңы “Бала ырысы” универсалдуу жөлөк пулу ишке кирет. Бул тууралуу Эмгек, социалдык камсыздоо жана миграция министрлигинде өткөн маалымат жыйынында белгилүү болду.

Министр Канат Сагынбаевдин айтымында, жаңы программа үй-бүлөлөрдү колдоого жана балдардын бакубат жашоосун камсыздоого багытталган. Өлкө боюнча 440 миңден 470 миңге чейин бала жөлөк пул алууга укуктуу болот.

Программаны каржылоого жыл сайын болжол менен 6,4 миллиард сом бөлүнөт. Ал эми 2026-жылдын экинчи жарым жылдыгы үчүн 3,1 миллиард сом каралган.

Жөлөк пул алуу үчүн арыздарды электрондук түрдө Түндүк мобилдик тиркемеси аркылуу тапшырууга мүмкүнчүлүк түзүлөт. Бул документтерди чогултуу процессин жеңилдетип, кызмат көрсөтүүнү тездетет.

ЮНИСЕФтин Кыргызстандагы өкүлү Самман Тапа “Бала ырысы” программасы балдардын ден соолугуна, өнүгүүсүнө жана өлкөнүн келечегине багытталган маанилүү инвестиция экенин белгиледи.