Эрулан Кокулов Караколдогу суу каптаган МИКтин үйү боюнча маселе көтөрдү (видео) 

Бүгүн, 3-майда Жогорку Кеңештин жыйынында депутат Эрулан Кокулов Каракол шаарында жамгырдан улам суу каптаган Мамлекеттик ипотекалык компаниянын үйлөрү боюнча маселе көтөрүп, ким жооптуу экенине кызыкты.

Эл өкүлү ал жерде болгонун айтып, курулуш сапатсыз экенин билдирди. Ошондой эле үйдү суу каптагандан кийин МИКтин окуя боюнча жооп бергенин сынга алды.

"МИК расмий жооп берген, бирок ал калп. Андай болгон эмес. Суу каптап кетүүнүн себеби - жамгырдын суусу топтолуп агып түшкөн түтүк. Дүйнө жүзүндөгү эң арзан баадагы түтүктү коюп коюшкан. Түтүккө күч келип, ал тешилип калган. Аны туура эмес да туташтырышкан. Жамгыр катуу жаагандан улам деген МИКтин жообу туурабы? Анда Бишкектеги үйлөрдүн баарын суу каптап калыш керек эле да. Бүткүл Кыргызстанга чыгып туруп ушинтип да калп айтса болобу? Азыр эми темир түтүк коюптур. Ал имаратка оордук келтирип, дубалдар да жарыла баштайт. Жабыркагандарга да барып келдим. Алардын батириндеги дубалдары кургай элек эле шыбак тартып, эптеп жаап жашырганы жатасыңар. Ал эртең эле көгөрүп чыгат. 8 кабаттуу үйдүн жер төлөсүнө чейин түшкөн суудан улам, көп кабаттуу үйдүн пайдубалына да зыйын келип жатат",- деди Кокулов.

Депутат жанындагы башка үйлөрдө да ушундай көйгөйлөр бар экенин кошумчалап, шалаакылык үчүн бирөө жооп бериши керектигин билдирди.

Эскерте кетсек, 19-майда Караколдо нөшөрлүү жаан жаап, МИК салган көп кабаттуу үйлөрдү суу каптаган.