АКШнын колдоосу менен Тайвань аскердик кубатын арттырууда

Тайвань 2029-жылдын башына чейин кемелерге каршы ракеталарынын санын 1,8 миңден ашырууну пландоодо. Бул чара Кытай тарабынан болушу мүмкүн болгон блокадага же аскердик баскынчылыкка каршы коргонуу мүмкүнчүлүгүн күчөтүүгө багытталган.

Маалыматтарга караганда, Тайбэй "асимметриялык коргонуу стратегиясына" өтүп, күчтүү атаандашка каршы салыштырмалуу арзан, бирок натыйжалуу куралдарды - ракеталарды жана дрондорду кеңири колдонууга басым жасоодо.

Планга ылайык, Тайвань 2029-жылга чейин АКШдан алынуучу 850 даана Harpoon ракетасына жана өзүндө өндүрүлгөн миңден ашуун Hsiung Feng II жана Hsiung Feng III канаттуу ракеталарына ээ болот.

Ошондой эле өлкө 1-июлдан тарта жээк коргонуу күчтөрүнүн жаңы командачылыгын түзүп, радарларды, ракеталарды жана дрондорду бирдиктүү башкаруу системасына бириктирет.

Тайвандык эксперттер мындай арсенал Тайвань кысыгында "жок кылуу аймагын" түзүп, мүмкүн болгон баскынчыл күчтөрдүн жээкке түшүүсүнө жол бербөөгө жардам берерин белгилешүүдө.