Беларустун өкмөт башчысы Бишкектеги таштанды заводунун иши менен таанышты (видео)

Кечээ, 4-июнда Беларустун премьер-министри Александр Турчин Кыргызстандагы расмий сапарынын алкагында Бишкек санитардык полигонунун аймагына барды.

Мэриянын басма сөз кызматы кабарлагандай, шаар мэри Айбек Жунушалиев конокту тосуп алып, өткөн жылдын декабрь айында пайдаланууга берилген таштандыларды сорттоочу жайдын иши менен тааныштырды.

Беларустун өкмөт башчысы комплекстин иштөө схемасы сабаттуу жана натыйжалуу түзүлгөнүн баса белгилеп: "Бүтүндөй комплекс туура уюштурулган экен. Сиздерде калдыктарды кайра иштетүү маселелерин сарамжалдуу чечүүгө мүмкүндүк берген жакшы туюк цикл түзүлүптүр",- деди.

Иш сапарынын жүрүшүндө делегация калдыктарды кайра иштетүү менен электр энергиясын өндүрүүчү эко-технологиялык заводго да барды. Конокторго долбоордун ишке ашырылуу жүрүшү, анын өндүрүштүк кубаттуулугу жана борбор калаа үчүн экологиялык мааниси тууралуу маалымат берилди.

Долбоордун ишке ашырылышы учурда этап-этабы менен жүрүүдө. Экинчи этап аяктагандан кийин Борбордук Азиядагы эң ири катуу калдыктарды кайра иштетүү жана электр энергиясын өндүрүү долбооруна айланат.

Иш сапардын жыйынтыгында шаар мэри жолугушуу жана тажрыйба алмашуу эки тарап үчүн тең пайдалуу болуп, кызматташтыкты мындан ары өнүктүрүүгө салым кошорун белгиледи.