Аткаминер кибералдамчылыктын 7 түрүн айтып берди

Кибералдамчылыктын негизи 7 түрү бар. Бул тууралуу Жогорку Кеңештин тармактык комитетинин жыйынында ички иштер министринин орун басары Эркебек Аширходжаев билдирди.

Анын айтымында, биринчи түрү - жасалма сайттар, шектүү шилтемелерди жарандардын мобилдик тиркемесине жөнөтүү. Мында шылуундар ар түрдүү шылтоолор менен жеке маалыматтырды алууга жетишишет. Экинчиси, телефон чалып, өздөрүн банк же укук коргоо органдары катары тааныштыруу. Алар жаранга банктык эсеби коркунучта экенин же насыя алынып жатканын айтуу менен акчаны өздөрүнүн эсебине котортуп алышат. Үчүнчүсү - SIM-картанын мөөнөтүн узартуу шылтоосу. Бул схемада алдамчы анын жеке коддорун сурап алууга жетишет.

Төртүнчүсү - мобилдик тиркемелер аркылуу жарандарга жакындары аркылуу жиберилген билдирүүлөр. Мында шылуундар жарандардын аккаунтуна киришип, анын атынан жакындарынан ачкча сурашат. Бешинчи схема - интернет аркылуу товар сатуу. Алдамчылар бул жол менен жарандардын башын айлантып коюшат. Алтынчысы, криптовалютага байланыштуу алдамчылык болсо, жетинчи түрү телеграммдагы үч бурчтук схема болуп саналат. Мында да криптовалюта аркылуу алдамчылар кайырмакка илишет.