Ошто 5200 орундуу заманбап футбол аренасы курулат

Ош шаарында жаңы футбол аренасын куруу долбоору ишке ашырылат. Бул тууралуу шаардык мэриядан билдиришти.

Маалыматка ылайык, 8-июнда шаар мэри Жанарбек Акаев, Кыргыз футбол биримдигинин өкүлдөрү жана тиешелүү мекемелердин жетекчилери курулуш жүргүзүлө турган аймак менен жеринде таанышты.

Жаңы спорттук комплекс «Ош Арена» деп аталып, 5200 көрүүчүгө ылайыкталат. Долбоорду өлкө президенти Садыр Жапаров колдоп жатканы белгиленди.

Арена спорттук мелдештерден тышкары маданий иш-чараларды өткөрүүгө да ылайыкташтырылып, шаардагы спорт инфраструктурасын өнүктүрүүгө өбөлгө түзөт. Ошондой эле А. Момунов атындагы футбол академиясынын аймагында күйөрмандар үчүн жаңы трибуна куруу пландары да талкууланды.

Жаңы футбол аренасы келечекте республикалык жана эл аралык деңгээлдеги мелдештерди өткөрүүгө мүмкүнчүлүк берген заманбап спорттук жайлардын бири болот.