Мектеп окуучуларынын тамак-ашына күнүнө 40 сом бөлүнөт

Кыргызстанда мектеп окуучуларынын тамактануусун каржылоо көлөмү дээрлик үч эсеге көбөйөт. Бул тууралуу президенттин басма сөз кызматынан билдиришти.

Маалыматка ылайык, президент Садыр Жапаров кол койгон чечимге ылайык, 2027-жылдын 1-январынан тарта 1-4-класстын окуучулары үчүн мектеп тамак-ашына бөлүнүүчү каражат күнүнө 40 сомду түзөт.

Учурда бул максатка бир окуучуга күнүнө 14 сом каралган. Жаңы ченем мектептерде тамак-аштын сапатын жакшыртып, рационго эт, балык, сүт азыктары, ошондой эле жашылча-жемиштерди көбүрөөк кошууга мүмкүнчүлүк берет.

Адистердин айтымында, мындай өзгөрүү окуучулардын тең салмактуу тамактануусун камсыздап, ден соолугун чыңдоого өбөлгө түзөт. Ошондой эле өлкөнүн ар кайсы аймактарындагы мектептерде тамактанууну уюштуруудагы айырмачылыктарды азайтып, үй-бүлөлөрдүн каржылык чыгымдарын жеңилдетүүгө жардам берет.

Чечимди ишке ашыруу үчүн
Финансы министрлигине 2027-жылдан тартып кошумча бюджеттик каражаттарды кароо тапшырмасы берилди.