Курулуш министрлиги жарандарды алдамчылардан сак болууга чакырат

Курулуш, архитектура жана турак-жай коммуналдык чарба министрлиги жарандарды алдамчылык аракеттерден сак болууга үндөдү.

Министрликтин маалыматына ылайык, акыркы учурда өздөрүн мекеменин кызматкери катары тааныштырып, телефон аркылуу байланышкан, билдирүү жөнөткөн же акча каражатын которууну талап кылган учурлар катталууда.

Министрлик мындай аракеттерге эч кандай тиешеси жок экенин белгилеп, мессенджерлер аркылуу же жеке байланыштар аркылуу акча чогултуу иштерин жүргүзбөй турганын расмий билдирди.

Мекеме жарандарды этият болууга, шектүү билдирүүлөргө ишенбөөгө жана мындай фактыларга туш болгон учурда дароо укук коргоо органдарына кайрылууга чакырды.

Тиешелүү органдар алдамчылык схемаларынын алдын алуу боюнча иштерди улантып жатканын белгилешти.