Ак-Сууда өзүн өрттөп каза болгон аял: Маркумдун балдары тууралуу маалымат айтылды

Акыйкатчы институту Ак-Суу районунда ушул жылдын февраль айында өзүн өрттөп каза болгон аялдын балдары тууралуу маалымат берди.

Ага ылайык, маркум 4 баласын жалгыз тарбиялап келген. Учурда 3 баласы атасынын камкордугуна өткөрүлүп берилген. Ал эми кенже кызы экинчи никеден төрөлгөндүктөн, ал да өз атасы менен жашайт. Балдарга ай сайын 3300 сомдон жөлөк пул төлөнүүдө.

Белгилей кетсек, үстүбүздөгү жылдын февраль айында Ак-Суу районунда өспүрүм кыздын кош бойлуу болуп калгандыгына байланыштуу апасы кызы менен бирге милиция бөлүмүнө суракка чакырылат. 40 жаштагы аял райондук ички иштер бөлүмүнүн астындагы унаа токтотуучу жайда өзүн өрттөп, алган жаракатынан каза болгон.

Аталган окуя боюнча кызматтык иликтөө жүргүзүлүп, тергөөгө чейинки текшерүүдө кемчиликтерге жана кызматтык тартипти бузууга жол берген кызматкерлерге тартиптик чаралар көрүлгөн.

Акыйкатчы Жамиля Жаманбаева маркумдун төрт баласынын абалын жана алардын укуктарынын камсыздалышын көзөмөлдөөнү улантууда.