Ошто жайгашкан институттун Түштүк башкармалыгы жаңы кеңсеге көчөт

Курулуш министрлигине караштуу Жер титирөөгө туруктуу курулуш жана инженердик долбоорлоо мамлекеттик институтунун Түштүк башкармалыгы жакын арада жаңы административдик имаратка көчөт.

Аталган мекемеден билдиришкендей, институттун директору Канат Канболотов Ош шаарындагы башкармалыкка иш сапары менен барып, кызматкерлер менен жумушчу жыйын өткөрдү. Жолугушууда мекеменин учурдагы ишмердүүлүгү, аткарылып жаткан иштер жана алдыдагы пландар талкууланды.

Ошондой эле директор жаңы кеңсеге көчүү боюнча даярдык иштеринин жүрүшү менен таанышып, капиталдык оңдоодон өтүп жаткан имаратты жеринен көрүп чыкты. Ал курулуш жана оңдоо иштеринин сапатына өзгөчө көңүл буруп, жооптуу кызматкерлерге тиешелүү тапшырмаларды берди.

Учурда жаңы кеңсе кызматкерлер үчүн заманбап жана ыңгайлуу эмгек шарттарын түзүү максатында капиталдык оңдоодон өткөрүлүүдө.

Маалыматка ылайык, долбоор ишке ашкандан кийин институттун түштүк аймактардагы ишмердүүлүгү күчөтүлүп, инженердик изилдөө жана долбоорлоо кызматтарынын сапаты дагы жогорулайт.