Болот Ибрагимов ИИМ академиясына барды

Бүгүн, 12-июнда Жогорку Кеңештин төрагасынын орун басары Болот Ибрагимов генерал-майор Эргеш Алиев атындагы ИИМ академиясына иш сапары менен барды. Бул тууралуу ИИМдин басма сөз кызматынан билдиришти.

Маалыматка ылайык, сапардын жүрүшүндө вице-спикер окуу жайдын ишмердүүлүгү жана материалдык-техникалык базасы менен таанышты. Ал китепкананы, музейди, ашкананы, окуу аудиторияларын, компьютердик класстарды жана практикалык сабактар өткөрүлүүчү атайын кабинеттерди көрүп чыкты.

Ошондой эле конокко жаңыланган телестудия, ок атуучу тир, саптык аянтча, ошондой эле жакында пайдаланууга берилген футбол жана воркаут аянтчалары көрсөтүлдү.

Академиянын башчысы Азамат Ногойбаев окуу жайда жүргүзүлүп жаткан өзгөрүүлөр тууралуу маалымат берип, курсанттардын сапаттуу билим алышы үчүн заманбап технологияларды киргизүү жана окуу шарттарын жакшыртуу боюнча иштер уланып жатканын белгиледи.

Өз кезегинде Болот Ибрагимов академиянын курсанттары өлкөнүн коопсуздугун, мыйзамдуулукту жана коомдук тартипти камсыздоодо чоң жоопкерчиликке ээ экенин айтып, алардын кесиптик даярдыгы үчүн бардык зарыл шарттарды түзүү маанилүү экенин баса белгиледи.

Ал ошондой эле ИИМ академиясын өнүктүрүүгө жана ички иштер органдары үчүн келечектеги адистерди даярдоо системасын өркүндөтүүгө багытталган демилгелерди колдоого даяр экенин билдирди.