Кыргызстан–Кытай чек арасындагы өткөрүү пункттары убактылуу жабылат

Кыргызстан менен Кытайдын мамлекеттик чек ара тилкесиндеги айрым өткөрүү пункттары убактылуу жабылат. Бул тууралуу бүгүн, 18-июнда Мамлекеттик чек ара кызматы билдирди.

Маалыматка ылайык, мындай чечим Кытайда белгиленүүчү “Дуаньу” (Ажыдаар кайыктарынын майрамы) майрамына байланыштуу кытай тараптын демилгеси менен кабыл алынган.

Чектөөлөр төмөнкү өткөрүү пункттарына тиешелүү:

• “Эркечтам” өткөрүү пункту 18-июнь күнү саат 22:00дөн тарта убактылуу жабылып, 20-июнда саат 08:00дө кайра ачылат.
• “Торугарт” өткөрүү пункту 19-июнда толугу менен жабылып, 20-июнда саат 08:00дөн тарта ишин жандантат.

Мамлекеттик чек ара кызматы жарандарды жана жүк ташуучуларды бул убактылуу чектөөлөрдү алдын ала эске алууга чакырды.