Чыгыш өнөрүнүн устаты Макен Исаковдун юбилейине арналган фестиваль өттү

Бүгүн, 22-июнда Жогорку Кеңештин төрагасы Марлен Маматалиев белгилүү чыгыш таймаш өнөрүнүн чебери Макен Исаковдун 80 жылдык маарекесине арналган эл аралык фестивалга катышты. Бул тууралуу Жогорку Кеңештин басма сөз кызматынан билдиришти.

Маалыматка ылайык, иш-чарада төрага маареке ээсин куттуктап, анын эмгек жолу өлкөнүн спорт жана маданият тармагына зор салым кошконун белгиледи.

Анын айтымында, Макен Исаков карате, ушу, тайцзи жана цигун сыяктуу чыгыш өнөрлөрүн Кыргызстанда өнүктүрүүгө жана жайылтууга чоң эмгек сиңирген. Ошондой эле ал өзүнүн мектебин негиздеп, жаштарды сергек жашоо образына үндөгөнү белгиленди.

Мындан тышкары Макен Исаковдун сүрөтчүлүк чыгармачылыгы да өзгөчө бааланып, искусство менен спортту айкалыштырган инсан катары мүнөздөлдү.

Фестивалдын соңунда төрага катышуучуларга ийгилик каалап, маареке ээсине белектерин тапшырды.

Иш-чарага ошондой эле депутаттар Максат Алымбеков, Улан Сариев жана Бекмурза Эргешов катышты.