Министр Канатбек Чыныбаев Ак-Талаадагы селден жабыркаган айылдарды кыдырды

Бүгүн, 22-июнда Нарын облусунун Ак-Талаа районундагы Кара-Бүргөн айыл аймагына караштуу Ак-Чий жана Жаңы-Тилек айылдарында нөшөрлөп жааган жаандын кесепетинен сел жүрүп, турак жайларга жана бир катар инфраструктуралык объектилерге зыян келтирди.

Маалыматка ылайык, табигый кырсыктын кесепеттерин жеринен көрүү жана жергиликтүү тургундар менен жолугушуу максатында Өзгөчө кырдаалдар министри Канатбек Чыныбаев аталган айылдарга барып, кырдаал менен жеринде таанышты.

Министр Жаңы-Тилек айылында селден жабыркаган турак жайлардын ээлери менен жолугушуп, сел калдыктары топтолгон каналдарды тазалоо иштери жүргүзүлөрүн билдирди. Ошондой эле тургундардын кайрылуусунун негизинде коргоо курулмаларын куруу маселеси адистердин техникалык корутундусуна ылайык караларын белгиледи.

Мындан тышкары, Ак-Чий айылынын жогорку бөлүгүндө жайгашкан алты турак жайды сел коркунучунан коргоо боюнча иштерди Өзгөчө кырдаалдар министрлигинин 2026-жылга карата «Атайын алдын алуу жана кесепеттерин жоюу» иш-чаралар планына кошумча киргизүү боюнча тиешелүү сунуштарды берди.

Ошондой эле «Мыкаачы» суусунун нугунда топтолгон сел калдыктарын жана бак-дарактарды тазалоо иштерин уюштуруу боюнча жооптуу кызматтарга тапшырмалар коюлду.

Учурда Ак-Талаа районунун Жарандык коргонуу кызматтарынын өкүлдөрүнүн катышуусунда Ак-Чий айылында кырдаалга байланыштуу жумушчу кеңешме өтүп, селдин кесепеттерин жоюу жана алдын алуу чаралары талкууланууда.