“Бала ырысы” жөлөк пулу боюнча түшүндүрүү иштери күчөтүлдү

Кыргызстандын бардык аймактарында үч жашка чейинки балдарга арналган жаңы “Бала ырысы” ай сайын берилүүчү жөлөк пулу боюнча калк арасында маалыматтык-түшүндүрүү иштери жүргүзүлүүдө. Бул тууралуу Эмгек министрлигинен билдиришти.

Маалыматка ылайык, Эмгек, социалдык камсыздоо жана миграция министрлигинин аймактык бөлүмдөрүнүн кызматкерлери жергиликтүү тургундар менен жолугушууларды өткөрүп, жөлөк пулду алуу тартиби, талап кылынган документтер жана дайындоо шарттары тууралуу кеңири маалымат берүүдө.

Министрликтин маалыматына ылайык, “Бала ырысы” жөлөк пулуна арыздарды кабыл алуу 1-июлдан тартып башталат. Арыздар министрликтин аймактык бөлүмдөрү тарабынан бекитилген графиктин негизинде кабыл алынат.

Жарандарга так маалымат алуу жана жөлөк пулду өз убагында тариздөө үчүн жашаган жери боюнча аймактык бөлүмдөргө кайрылуу сунушталууда. Ал жерде адистер керектүү кеңеш жана практикалык жардам көрсөтүшөт.