Депутат: "Кара-Көлдө гемодиализ аппараты жок"

Жогорку Кеңештин депутаты Райимберди Дүйшенбиев парламенттин 25-июндагы жыйынында Кара-Көл шаарында гемодиализ аппараты жоктугун айтып, Саламаттык сактоо министрлигине кайрылды.

Эл өкүлү билдиргендей, аталган шаарда аппаратка муктаж болгон жарандар жумасына 3-4 жолу башка аймактарга барууга аргасыз болушууда.

"Кара-Көл шаарында гемодиализ аппараты жок. 15 жаран Таш-Көмүр, Токтогул шаарларына жумасына 3-4 жолу катташат. Саламаттык сактоо министрлиги бул маселени караштырып, шаарга аппарат бөлүп берсе жакшы болмок",- деди депутат.

Ошондой эле ал Таш-Көмүр жана Кара-Көл шаарларында медицина кызматкерлери жетишсиз экенин кошумчалады.