Президент Караколдогу реконструкцияланган сейил бакты көрүп чыкты (видео)

Бүгүн, 1-июлда президент Садыр Жапаров Каракол шаарында Пушкин атындагы сейил бакты реконструкциялоонун жүрүшү менен таанышты. Бул тууралуу президенттин басма сөз кызматы билдирди.

Маалымдалгандай, сейил бактын жалпы аянты 7,5 гектарды түзүп, реконструкциянын алкагында административдик имарат жана амфитеатр, 12 заманбап аттракцион, фонтандар жана балдар оюн аянтчалары курулган.

Ошондой эле президент шаарда ишке ашырылып жаткан бир катар инфраструктуралык долбоорлор менен таанышты. Алардын катарына жылуулук электр борборунун курулушу, шаардагы 22 чакырым жолду реконструкциялоо, жарыктандыруу жана суу агызуу системдерин куруу, шаардык тарых музейин капиталдык реконструкциялоо, көп функционалдуу спорт комплексин куруу, ошондой эле Токтогул Сатылганов атындагы мектеп-интернатынын имаратын оңдоо жана кошумча корпусун куруу кирет.

Мындан тышкары, өлкө башчысына 800 орундуу чоң театр залы бар Конгресс-холлдун башкы планы да сунушталды. Долбоордо жалпы аянты 14,8 миң чарчы метрден ашкан заманбап комплексти куруу каралган. Анда маданий-оюн-зоок жана административдик-ишкердик аймактар бириктирилет.