Адылбек Касымалиев орусиялык кесиптешин Чолпон-Атага чакырды

Министрлер кабинетинин төрагасы Адылбек Касымалиев менен Орусия өкмөтүнүн төрагасы Михаил Мишустин эки тараптуу жолугушуу өткөрүштү.

Ал Екатеринбург шаарында "Иннопром" эл аралык өнөр жай көргөзмөсүнүн алкагында өттү.

Сүйлөшүүлөрдүн жүрүшүндө тараптар кыргыз-орус кызматташуусунун күн тартибиндеги бир катар актуалдуу маселелерди талкуулашты. Өзгөчө соода-экономикалык, ошондой эле отун-энергетика комплекси, транспорт, курулуш, билим берүү жана маданият тармагындагы кызматташууга көңүл бурулду.

Жолугушуунун жүрүшүндө өкмөт башчы Мишустинди ушул жылдын август айында Чолпон-Ата шаарында өтө турган Евразия өкмөттөр аралык кеңешинин жыйынына катышуу үчүн Кыргызстанга келип кетүүгө чакырды.

Алдыда боло турган Евразия өкмөттөр аралык кеңешинин жыйынынын алкагында Кыргыз-Орусия экономикалык форуму, ошондой эле Кыргыз-Орусия аймактар аралык конференциясы өткөрүлөт.

Өз кезегинде Мишустин эки тараптуу кызматташтыкты тереңдетүү боюнча мындан аркы иштердин маанилүүлүгүн белгиледи.