Авариялык конуудан кийин "Тез Жеттин" аба каттамдарына киргизилген чектөө улантылат

Бүгүн, 9-июлда Кыргызстандын Жарандык авиация мамлекеттик агенттиги "Манас" эл аралык аэропортунда "Тез Жет" авиакомпаниясынын учагы менен болгон окуя боюнча кырдаалды көзөмөлдөп жатканын билдирди.

Маалыматка ылайык, авиакомпаниянын каттамдарын убактылуу токтотуу чечими бардык текшерүү иштери аяктап, окуянын жагдайлары толук аныкталганга чейин күчүндө болот.

Ошондой эле учуу коопсуздугун күчөтүү максатында өлкөдөгү башка авиакомпанияларда да кошумча инспекциялык текшерүүлөр жүргүзүлөрү маалымдалды.

Эскерте кетсек, 187 жүргүнчүсү бар "Тез Жет" авиакомпаниясына таандык учак 7-июлда авариялык конуу жасаган. Анын кесепетинен учактын күйүүчү майы төгүлүп, "Манас" эл аралык аэропорту бир түн ишин токтотту.

Ал эми бүгүн болсо "Асман Эйрлайнс" авиакомпаниясына таандык учак Раззаков багыты боюнча учуп барып коно албай кайтты.