Ош көчөсүндөгү оңдоо иштери эки нөөмөттө жүрүүдө

Ош көчөсүндө реконструкциялоо иштери күчөтүлгөн тартипте уланууда. Курулуштун темпин тездетүү үчүн жол куруучулар эки нөөмөт менен иштеп жатышат. Бул тууралуу шаардык мэриядан билдиришти.

Маалыматка ылайык, түнкү убакта эски курулуштарды демонтаждоо жүргүзүлсө, күндүз жолдун негизин даярдоо жана көчөнү иретке келтирүү иштери аткарылууда. Учурда суу жана газ түтүктөрү тартылып жатат. Мындан тышкары буга чейин бул көчөдө болбогон борбордук канализация тармагы да курулат.

Долбоордун алкагында электр мамычалары көчүрүлүп, заманбап тротуар салынып, жол төрт тилкеге чейин кеңейтилет.

Бүгүн Ош шаарынын мэри курулуш объектисине барып, аткарылып жаткан иштер менен жеринен таанышты. Ал курулуштун сапатын камсыздап, иштерди белгиленген мөөнөттө бүтүрүүнү тапшырды.