Бишкекте бетондун сапатын текшерүү процесси көрсөтүлдү

Бүгүн, 9-июлда Курулуш, архитектура жана турак жай-коммуналдык чарба министри Нурдан Орунтаев жалпыга маалымдоо каражаттарынын өкүлдөрүнө Бишкек шаарында курулуп жаткан «Асман Резиденс» турак жай комплексиндеги курулуш иштери жана лабораториялык текшерүү процесси менен тааныштырды.

Маалыматка ылайык, иш-чаранын жүрүшүндө Жер титирөөгө туруктуу курулуш жана инженердик долбоорлоо институтунун адистери бетондун сапатын текшерүү ыкмасын практикалык түрдө көрсөтүштү.

Алар атайын жабдуунун жардамы менен имараттын дубалынан цилиндр формасындагы бетон үлгүсүн (керн) алып, аны лабораториялык изилдөөгө жөнөтүү тартибин түшүндүрүштү. Бул ыкма аркылуу бетондун бекемдиги, сапаты жана долбоордук талаптарга шайкештиги аныкталат.

Белгиленгендей, «Асман Резиденс» турак жай комплексин «Кап Строй Кей Джи» ЖЧКсы куруп жатат. Объект Бишкек шаарындагы Лев Толстой көчөсү менен Чыңгыз Айтматов проспектисинин кесилишинде жайгашкан.