Кыргызстанда айрым тарифтерди жана төлөмдөрдү көтөрүүгө бир жылдык мораторий киргизилди

Президент Садыр Жапаров калк үчүн айрым тарифтерди, жыйымдарды, мамлекеттик жана муниципалдык кызмат көрсөтүүлөрдүн наркын, ошондой эле башка милдеттүү төлөмдөрдү жогорулатууга убактылуу мораторий киргизүү тууралуу жарлыкка кол койду.

Жарлыкка ылайык, мораторий бир жылга күчүндө болот. Бул аралыкта мамлекеттик органдар, жергиликтүү өз алдынча башкаруу органдары, мамлекеттик жана муниципалдык мекемелер менен ишканалар мораторийге кирген тарифтерди жана төлөмдөрдү көтөрө алышпайт.

Документтин негизги максаты — жарандардын кызыкчылыгын коргоо, үй-бүлөлүк бюджеттердин туруктуулугун сактоо жана калкка кошумча каржылык жүктү болтурбоо.

Ошол эле учурда өлкөнүн коопсуздугу, стратегиялык маанидеги тармактар менен критикалык инфраструктуранын үзгүлтүксүз иштеши жана Кыргызстандын эл аралык милдеттенмелерин аткаруу зарыл болгон учурларда өзгөчө шарттар каралган.

Бийликтин маалыматына ылайык, бул чечим коммуналдык жана мамлекеттик кызмат көрсөтүүлөргө кеткен чыгымдардын кескин өсүшүн алдын алып, өзгөчө калктын аялуу катмарларын колдоого багытталган.