Аллергиядан жабыркаган жаран боюнча талаштуу окуяга милиция комментарий берди (видео)

Чолпон-Ата шаарында катуу аллергиядан улам дем ала албай калган жаранды ооруканага алып бара жаткан унаа милиция тарабынан токтотулганы тууралуу маалымат тарады. Жабыркаган жарандын жакындары жол тескөөчүлөрүнө абалды түшүндүргөнүнө карабай, унааны жарым сааттай кармап турушканын билдирген видеону социалдык тармактарга жарыялады.

Ал эми Патрулдук милиция бул маалыматты четке кагып, кызматкерлер унааны токтоткондо милдеттүү камсыздандыруу полиси жок экенин аныкташканын билдирди. Мекемеден кошумчалагандай, унаада медициналык жардамга муктаж жаран бар экени белгилүү болгондо, кызматкерлер аны дароо кызматтык унаа менен ооруканага жеткиришкен.

Дарыгерлер жаранда кымыз ичкенден кийин аллергиялык реакция болгонун аныктап, жардам көрсөтүлгөнүн жана ошол эле күнү ооруканадан чыгарылганын билдиришти.