Азербайжандык журналисттер өлкөгө келишти

Азербайжандын алдынкы жалпыга маалымдоо каражаттарынын өкүлдөрүнөн турган делегация таанышуу сапары менен Кыргызстанга келишти. Бул тууралуу президенттин администрациясы билдирди.

Маалымдалгандай, аталган иш-чара өлкө башчы Садыр Жапаровдун тапшырмасы менен уюштурулган. Бул сапар маалыматтык жана гуманитардык тармактардагы кыргыз-азербайжан кызматташтыгын мындан ары тереңдетүүгө багытталган.

Кыргызстанда жүргөн мезгилде азербайжандык журналисттер өлкөнүн алдынкы жалпыга маалымдоо каражаттарынын ишмердүүлүгү, мамлекеттик маалыматтык саясатты жүргүзүүдөгү заманбап ыкмалар менен таанышышат. Ошондой эле өлкөнүн жаратылышы кооз жана туристтик жайларын камтыган маданий-таанышуу программасына катышышат.

Буга чейин ушундай эле таанышуу сапарлары Казакстандын, Өзбекстандын жана Тажикстандын алдынкы жалпыга маалымдоо каражаттарынын өкүлдөрү үчүн ийгиликтүү уюштурулган.