Өкмөт башчынын орун басары жерди ижарага берүү боюнча пикирин билдирди

Министрлер кабинетинин жетекчисинин биринчи орун басары Данияр Амангелдиев "Азаттыкка" берген маегинде чет өлкөлүк инвесторлорго жерди 49 жылга берүү боюнча түшүндүрмө берди.

Ал ири инвесторлор 5 жылга көп көлөмдөгү акчаны актатуу коркунучу бардыгынан улам салбастыгын айтты. Министр 49 жылдык ижара башка өлкөлөрдө деле бар экенин белгилеп, инвесторлорго шарт түзүү зарыл деген пикирин билдирди.

"Заводду алар чет жакка алып кетпейт, бизде эле калат. Ал заводдо биздин жарандар иштейт. Иштелип чыккан өндүрүмдөр биздин ички дүң өндүрүмгө кошулат. Казынага салык түшөт",- деди министр.

Ошондой эле Амангелдиев "ата мекендик ишкерлерге эмнеге берилбейт?" деген суроого жооп берди.

"Мисалы, Аскар Салымбеков же Өмүрбек Бабановду алсак, алардын ири инвестиция салганга каражаттары жетпейт. Инфрасктураны түзсө дагы, аны башкарууга деңгээлдери жетпейт. Анткени дүйнөлүк тажрыйбасы бар инвестор болушу керек",- деп кошумчалады.