Өзгөндө сабалган дүкөнчү аялдын эки колу сынганы айтылууда

Ош облусунун Өзгөн районундагы сыра заводунун жанындагы дүкөндө сабалган аялдын кызы окуя боюнча билдирүү жасап, апасы учурда оор абалда ооруканада жатканын айтты.

Анын айтымында, жаңжал кардарлар эсеп төлөөдөн баш тартып, оозеки кайым айтышуудан кийин чыккан.

"Видеодон алардын апамды уруп, чачынан сүйрөп жатканын көрүүгө болот. Биз дароо милиция чакырганбыз, бирок кызматкерлер окуядан кийин гана келишти. Сабоонун кесепетинен апамдын эки колу сынып, азыр ооруканада оор абалда жатат",- деп билдирди ал.

Ал окуяга күбө болгон же шектүүлөр тууралуу маалыматы бар жарандарды укук коргоо органдарына же өзүнө маалымат берүүгө чакырды. Ошондой эле иш адилеттүүлүк менен каралуусу керектигин белгиледи.

Эскерте кетсек, буга чейин аталган окуянын видеосу интернет желесине тараган. Милиция жагдай боюнча толук түшүндүрмө берип, тергөө иштери уланып жатканын кабарлады.