Тышкы иштер министринин жаңы орун басары тааныштырылды

Тышкы иштер министрлигинин жамаатына жаңы дайындалган министрдин орун басары Сейтек Жумакадыр уулу расмий тааныштырылды. Бул тууралуу ТИМдин басма сөз кызматынан маалымдашты.

Маалыматка ылайык, тааныштыруу аземинде президенттик администрациянын тышкы саясат бөлүмүнүн башчысы Сагынбек Абдумуталип жаңы орун басардын тажрыйбасы, билими жана кесиптик даярдыгы министрликтин тышкы саясаттагы ишмердүүлүгүнө олуттуу салым кошоруна ишеним билдирди.

Ал эми тышкы иштер министри Жээнбек Кулубаев Сейтек Жумакадыр уулуна жооптуу кызматында ийгиликтерди каалап, жүктөлгөн милдеттерди натыйжалуу аткарарына ишеним артты.

Сейтек Жумакадыр уулу 1988-жылы 21-майда Нарын облусунун Ат-Башы айылында төрөлгөн. Жусуп Баласагын атындагы Кыргыз улуттук университетинин чет тилдер факультетин жана Экономика жана бизнес институтунун магистратурасын аяктаган.

Ал Тышкы иштер министрлигинде 2011-жылдан бери эмгектенип, стажёрдон тартып Консулдук департаментинин директоруна чейин кызмат өтөгөн. Бул кызматты 2024-жылдын октябрынан бери аркалап келген. Дипломатиялык рангы – атайын жана ыйгарым укуктуу элчи. Англис, кытай жана түрк тилдерин билет.

2026-жылдын 27-июлунда министрлер кабинетинин төрагасы Адылбек Касымалиевдин тескемеси менен Кыргыз Республикасынын тышкы иштер министринин орун басары болуп дайындалды.