Садыр Жапаров Өзбекстандын президентин тосуп алды (видео)

Бүгүн, 30-июлда Өзбекстандын президенти Шавкат Мирзиёев Кыргызстанга мамлекеттик сапары менен келди. Жогорку даражалуу мейманды “Ысык-Көл” эл аралык аэропортунан президент Садыр Жапаров тосуп алды.

Президенттин администрациясынан кабарлашкандай, Шавкат Мирзиёев учактан түшкөндөн кийин улуттук кыргыз кийимчен кыздар ага меймандостуктун жана конокко болгон сый-урматтын белгиси катары боорсок менен бал сунушту.

Аэропорттун аянтында Ардак кароол ротасынын аскер кызматкерлери тизилип турушту. Андан ары президенттер өтүүчү жолдун боюнда “Салбуурун” этнографиялык композициясынын катышуучулары – бүркүтчүлөр алгыр куштары жана тайгандары менен турушуп, бийчилер кыргыздын улуттук бийлерин аткарышты. Кыргыз жана өзбек күүлөрү аткарылып, боордош эки элдин достугун, өз ара сый-урматын жана ынак коңшулук мамилесин даңазаланды.

Белгилей кетсек, мамлекеттик сапардын алкагында тараптар бетме-бет жана кеңейтилген курамдагы сүйлөшүүлөрдү өткөрөт. Ошондой эле Шавкат Мирзиёев Ысык-Көл облусунун Чолпон-Ата шаарында өтө турган Борбордук Азия мамлекеттеринин жана Азербайжандын мамлекет башчыларынын бейформал Консультативдик жолугушуусуна катышат.