Мурдагы элчи Идрис Кадыркулов анын дарегине айтылган айыптоолорго жооп берди (видео)

Бүгүн, 13-ноябрда Кыргызстандын Украинадагы мурдагы элчиси Идрис Кадыркулов анын дарегине айтылган сөздөргө жооп катары социалдык тармактагы баракчасынан кайрылуу жасады.

Белгилей кетсек, ушул жылдын 8-ноябрында президенттин Москва районунун тургундары менен жолугушуусунда, Ак-Суу айыл өкмөтүнөн жаран кайрылган. Анын айтымында, Кадыркуловдордун үй-бүлөсү колхоздун имаратын менчиктештирип жана 3500 гектар жерди мыйзамсыз ээлеп алышкан. Ошондой эле мурдагы элчинин агасы, инисинин кызматтык абалынан пайдаланып айылдык тургундарга үстөмдүк кылып келе жатканын белгилеген.

Ал эми Идрис Кадыркулов анын жана бир туугандарынын дарегине айтылган сөздөр чындыкка дал келбей тургандыгын айтты.

"Колхоздун имараты боюнча айта турган болсом, 2004-жылы агаларым өз күчү менен айыл-чарба кооперативин түзүп, имаратты мыйзамдуу түрдө менчик ээлеринен сатып алышкан. Бул сыяктуу арыздар мындан алты жыл мурун да түшүп, бир нече жолу катуу текшерүүлөр жүргүзүлгөн. Тилекке каршы, ошол окуялардын артынан көптөгөн көйгөйлөр жаралып, агам Рустамбек Кадыркуловдон айрылып калдык.

Учурда мени каралап жаткан адам президенттикке талапкерлигин коюуга арызын сунуштаган. Ушул мүмкүнчүлүктөн пайдаланып, президент Садыр Жапаровго да кайрылгым келет. Сизге кайрылган жарандын Ак-Суу айыл өкмөтүнө эч кандай тиешеси жок экенин белгилегим келет. Менин оюмча, бул президенттик шайлоонун алдында уюштурулуп жаткан саясий аракет жана биздин үй-бүлөнүн аброюна шек келтирүү аракети.

Мен эч ким менен талашып-тартышууну каалабайм. Бирок мындан ары менин жана үй-бүлөмдүн аброюна шек келтирген аракеттерге көз жумуп карап отурбайм. Өз укугумду мыйзам чегинде коргойм",- деп билдирди мурдагы элчи.

Эскерте кетсек, Идрис Кадыркулов бүгүн элчилик кызматынан бошотулду.