Бишкек Шаньдун провинциясы менен кызматташат

Бишкекте 30-июлда "Кытай (Шаньдун провинциясы) – Шанхай кызматташтык уюмуна мүчө мамлекеттер" аттуу соода-экономикалык кызматташтык боюнча конференция болуп өттү.

Иш-чарага Бишкек шаарынын мэринин биринчи орун басары Кубанычбек Иманалиев катышып, борбордун инвестициялык жана экономикалык мүмкүнчүлүктөрүн тааныштырды.

Конференцияда Бишкек мэриясы менен Шаньдун провинциясынын Коммерция департаментинин ортосунда кызматташуу жөнүндө меморандумга кол коюлду.

Документ соода-экономикалык, инвестициялык жана өнөр жай тармактарындагы өз ара пайдалуу кызматташтыкты өнүктүрүүгө, ишканалардын ортосундагы ишкердик байланыштарды кеңейтүүгө, ошондой эле биргелешкен долбоорлорду ишке ашыруу үчүн шарттарды түзүүгө багытталган.

Мэриянын өкүлдөрү Кытай мамлекеттик органдарынын жана бизнес чөйрөсүнүн өкүлдөрү менен жолугушууларды өткөрүп, кызматташуунун келечектүү багыттарын талкуулашты.