Садыр Жапаров менен БАЭ президенти кат алышты

Өлкө башчы Садыр Жапаров менен Бириккен Араб Эмираттарынын президенти шейх Мохаммед бин Заед Аль Нахайян эки мамлекеттин ортосунда дипломатиялык мамилелердин түзүлгөнүнүн 30 жылдыгына байланыштуу куттуктоо телеграммалары менен алмашышты.

Президенттик администрация маалымдагандай, куттуктоо каттарында өткөн 30 жылдын ичинде мамлекеттер саясий диалогду бекемдеп, ар тараптуу багыттар боюнча мамилелерди ырааттуу өнүктүрүп, кызматташтыкты бийик деңгээлге көтөрө алганы белгиленген.

Мындан тышкары, мамлекет башчысынын дарегине ушундай эле куттуктоо каттары Бириккен Араб Эмираттарынын вице-президенти, премьер-министри жана Дубай эмири Мохаммед бин Рашид Аль Мактумдан, ошондой эле Бириккен Араб Эмираттарынын вице-президенти, премьер-министрдин орун басары жана президенттик аппараттын жетекчиси Мансур бин Заид Аль Нахайяндан да келип түшкөн.