Токтогул ГЭСин курууда келтирилген зыян үчүн компенсацияны көбөйтүү сунушталууда

Токтогул районунун жана Кара-Көл шаарынын Жазыкечүү айылынын аймагында Токтогул ГЭСин жана суу сактагычты курууда келтирилген зыян үчүн компенсациянын көлөмүн көбөйтүү сунушталууда.

Тийешелүү мыйзам долбоору парламенттин расмий сайтында коомдук талкууга чыгарылды.

Анда жылдык компенсацияны 70 миллион сомдон 358 миллион сомго көбөйтүү сунушталган. Аталган мыйзам долбоорун Жогорку Кеңештин төрагасы Марлен Маматалиев жана депутат Болотбек Борбиев демилгелеген.

2016-жылдан тарта бүгүнкү күнгө чейин ар жылдык компенсациянын өлчөмү 70 милион сомду түзөт. Бул өлчөм 10 жыл мурун белгиленген жана азыркы учурда заманбап экономикалык шарттарга, инфляциянын деңгээлине жооп бербейт.

Каржылоонун булагы болуп "Электр станциялары" ААКсы саналат.