ДКО учурунда майыптыгы бар 115 жаранга транспорттук жардам көрсөтүлдү

VI Дүйнөлүк көчмөндөр оюндарынын жүрүшүндө майыптыгы бар 115 жаран атайын транспорт кызматынан пайдаланды. Алардын арасында Кыргызстандын жарандары менен бирге чет өлкөдөн келген коноктор да бар.

Маалыматка ылайык, иш-чаралардын жеткиликтүүлүгүн камсыз кылуу жана жарандарды коштоп жүрүү үчүн социалдык коргоо системасынын 100гө жакын кызматкери тартылган. Адистер оюндар өтүп жаткан аймактарда багыт алууга көмөктөшүп, зарыл болгон консультацияларды беришкен.

Мындан тышкары, майыптык арабасын колдонгон жарандарды ташуу үчүн МСЭКтин 10 автоунаасы бөлүнгөн. Транспорт аркылуу жарандар «Газпром» спорттук комплексинде иш-чаралар өтүп жаткан жерлерге жеткирилип турган.

Ошондой эле Көчмөндөр оюндары учурунда атайын ишеним телефону иштеп, ага 1,3 миңге жакын кайрылуу түшкөн. Адистер жеткиликтүү инфраструктура, иш-чаралардын аймактары жана башка маселелер боюнча маалымат беришкен.

Ошентип, VI Дүйнөлүк көчмөндөр оюндары спорттук мелдештер менен катар майыптыгы бар жарандар үчүн жеткиликтүү шарттарды түзүүгө да өзгөчө көңүл бурулган иш-чара болду.