Ноокатта көп жылдан бери чечилбей келген 48 батирлүү үйдүн маселеси чечилди

Ноокат шаарындагы Аэропорт көчөсү, 48 дарегинде жайгашкан төрт кабаттуу, 48 батирлүү турак үй пайдаланууга берилди. Бул тууралуу Курулуш министрлигинен билдиришти.

Маалыматка ылайык, турак үйдүн курулушу 1986-жылы башталып, 1989-жылы токтоп калган. 2023-жылы Ноокат шаарынын мэриясы тарабынан курулуш иштери кайра жандандырылган. Бирок объектти пайдаланууга берүү маселеси узак убакытка чейин чечилбей келген.

Мындан улам батир ээлери үйлөрүн өз атына каттатып, укук белгилөөчү документтерди ала албай, коммуналдык кызматтар үчүн жогорулатылган тариф менен төлөп келишкен.

Учурда Курулуш, архитектура жана турак жай-коммуналдык чарба министрлигинин Ош региондук башкармалыгы тарабынан жашоочуларга объектти пайдаланууга берүү боюнча шайкештик актысы тапшырылды.

Эми үйдүн жашоочулары батирлерин мыйзамдуу каттоодон өткөрүп, тиешелүү документтерин алууга жана коммуналдык кызматтар үчүн белгиленген тарифтер боюнча төлөөгө мүмкүнчүлүк алышат.