ИИМ жетекчисинин биринчи орун басары БУУнун баш катчысынын орун басары менен жолукту

Ички иштер министринин биринчи орун басары Адылбек Бийбосунов бүгүн, 14-сентябрда БУУнун тынчтыкты сактоо операциялары боюнча башкы катчысынын орун басары Жан-Пьер Лакруа менен жолугушту. Бул тууралуу ИИМдин басма сөз кызматынан билдиришти.

Маалыматка ылайык, жолугушууда тараптар эл аралык тынчтык жана коопсуздук маселелерин, ошондой эле тынчтык орнотуу багытындагы кызматташтыкты мындан ары өнүктүрүүнү талкуулашты.

Өзгөчө көңүл Кыргызстандын 2027-2028-жылдары БУУнун Коопсуздук кеңешинин туруктуу эмес мүчөсү катары иш алып баруусуна байланыштуу кызматташтыктын негизги багыттарына бурулду.

Мындан тышкары, Кыргызстандын БУУнун тынчтык орнотуучу операцияларына катышуусу, тажрыйба алмашуу жана бул багыттагы өз ара аракеттенүүнү күчөтүү боюнча пикир алышуу болду.

Тараптар Кыргызстандын ички иштер органдарынын кызматкерлеринин БУУнун тынчтыкты сактоо миссияларына катышуу географиясын кеңейтүүнү жана миссияларга тартылган кызматкерлердин санын көбөйтүүнү сунушташты.

Жолугушуунун жыйынтыгында тараптар туруктуулукту, коопсуздукту жана туруктуу өнүгүүнү камсыз кылууга багытталган кызматташтыкты мындан ары бекемдөөнүн маанилүүлүгүн белгилешти.