Kесиптик билим берүүнү өнүктүрүү маселелери талкууланды

Бүгүн, 16-сентябрда, Агартуу министрлигинин өкүлдөрү менен DARYA регионалдык долбоорунун эксперттеринин жолугушуусу өттү.

Аталган министрликтен билдиришкендей, жыйында кесиптик билим берүүнү өнүктүрүү, кесиптик стандарттарды өркүндөтүү жана формалдуу эмес билим берүүнү таануу маселелери талкууланды.

Ошондой эле 2024-жылдан бери Кыргызстанда пилоттук негизде колдонулуп келе жаткан SCAFFOLD методологиясынын жыйынтыктары тааныштырылды. Учурда ал 5 кесиптик лицейде апробацияланып, 1868 педагог жана 7800дөн ашуун окуучу камтылган. Өлкөнүн жети облусунда 200дөн ашуун окутуу иш-чарасы өткөрүлгөн.

Тараптар SCAFFOLD методологиясын бардык кесиптик лицейлерге жайылтуу, педагогдордун жана өндүрүштүк окутуу мастерлеринин компетенцияларын жогорулатуу, ошондой эле жумуш ордунда окутууну өркүндөтүү маселелерин талкуулашты.

Агартуу министрлигинин өкүлдөрү кесиптик даярдыкты эмгек рыногунун талаптарына ылайык жакшыртуу жана долбоордун жыйынтыктарын туруктуу негизде улантуу маанилүү экенин белгилешти.