Депутат Ош-Эркечтам жолунда тыгын күчөгөнүн айтты (видео)

Жогорку Кеңештин депутаты Бекмурза Эргешов 16-сентябрдагы парламенттин тармактык комитетинин жыйынында Ош-Эркечтам унаа жолундагы тыгын көйгөйүн көтөрдү.

Депутат тыгын боюнча жарандардан кайрылуулар байма-бай келип жатканын айтып, маселени чечүү жолдоруна кызыкты. "Алайга 50 мүнөттө жете турган жерге азыр 3 сааттык жол болуп жатат. Маселени кандай чечсе болот?",- деди депутат.

Транспорт жана коммуникациялар министри Талантбек Солтобаев аталган унаа жолдо акыркы жылдары тыгын көбөйүп, коопсуздук жагынан да маселе бар экенин белгиледи.

Айтымында, Оштон Каратайга чейин 25 чакырым жол жасоо боюнча долбоор даярдалды. Биринчи этапта жол төрт тилкеге кеңейтилип, ортосуна тосмо коюлат. Кийинки этапта күзүндө Гүлчөгө чейинки жолду төрт тилкелүү кылып жасоо мерчемделүүдө.

Аталган иштер келерки жылы башталат.