Сокулук районунда жумуш орундары 5,8 эсеге көбөйдү

Бүгүн 6-ноябрда президент Садыр Жапаров Чүй облусунун Сокулук районун 2021-2026-жылдардагы өнүгүүсү менен таанышты. Бул тууралуу президенттик админстрациядан билдиришти.

Маалыматка караганда, Сокулук районунда акыркы беш жыл ичинде 41 ири ишкана, чакан жана орто бизнестин 189 субъекти ачылып жумуш орундарынын саны 5,8 эсеге көбөйдү. Энергетика тармагында кубаттуулугу 21,4 МВт болгон төрт чакан гидроэлектр станциясы пайдаланууга берилди. Азыркы учурда 167 чакырым автомобиль жолуна асфальт төшөлүп, 27 чакырым тротуар курулду. Калкты таза ичүүчү суу менен камсыз кылууну жакшыртуу жана санитария тутумдарын өнүктүрүү максатында 26 айылда “Тунук Суу” долбоору ишке ашырылууда.

Ошондой эле райондо 8 мектеп, 12 бала бакча, 21 спорттук объект, 16 медициналык имарат, 6 парк жана 3 социалдык шаарча курулганы айтылды. Мындан тышкары, президенттин Турукташтыруу фондунун каражаттарынын эсебинен эки мектептин жана эки бала бакчанын курулушу жүрүп жатат, дагы үч бала бакча капиталдык оңдоодон өткөрүлүүдө. Ошону менен бирге 300 орундуу дагы бир медициналык мекеменин курулуш иштери уланууда.