Кош-Дөбөдө 60 жылдан бери иштеп келген мектептин маселеси президентке жетти (видео)

Президент Садыр Жапаровдун кечээ, 8-ноябрда Чүй облусуна караштуу Москва районунун тургундары менен жолугушуусунда Кош-Дөбө айылынын тургуну Айида Нуракова айылдагы мектептин абалына көңүл бурууну өтүндү.

"Биз азыр 1961-жылы курулган мектепте билим алып жатабыз. Эч кандай шартыбыз жок. Мектеп 80 пайыз авариялык абалда. Бизде спорт зал да жок",- деди ал.

Садыр Жапаров курулуш министри Нурдан Орунтаевден аталган мектеп жаңы курула турган 111 мектептин тизмесине кирген-кирбегенин сурады. Министр тизмеде жок экенин айтып, мектепти капиталдык оңдоодон өткөрүү мүмкүнчүлүгү болушу мүмкүн экенин белгиледи.

Мамлекет башчысы билим берүү жана курулуш министрлерине мектептин абалын текшерүүнү тапшырды.

"Эгерде чындап эле абалы начар болсо, жаңы мектеп салып берели",- деди ал.