Кыргызстандын бюджети 10 айда 669,6 миллиард сом киреше тапты

Кыргызстандын республикалык бюджетинин кирешеси 2026-жылдын алгачкы 10 айында 669,6 миллиард сомду түздү. Бул белгиленген пландан 17,3 миллиард сомго көп. Киреше планы 102,7 пайызга аткарылганын министрлер кабинетинин төрагасы Адылбек Касымалиев аппараттык кеңешмеде билдирди.

Президенттик администрациянын берген маалыматына ылайык, Мамлекеттик салык кызматы 288,5 миллиард сом чогултуп, планды 102,7 пайызга аткарды. Ал эми Мамлекеттик бажы кызматынын кирешеси 155,6 миллиард сомду түзүп, план 104,1 пайызга аткарылды.

"Кеңешмеде өлкөдөгү ишкердик активдүүлүктүн көрсөткүчтөрү да каралды. 2026-жылдын октябрында Кыргызстандагы ишкердик активдүүлүк индекси 58,7 пунктту түздү. Бул апрель айындагы көрсөткүчтөн 0,6 пунктка жогору. Белгиленгендей, 50 пункттан жогору көрсөткүч ишкердик активдүүлүктүн өсүп жатканын билдирет. Өсүшкө өнөр жай өндүрүшү, курулуш, инвестициялык активдүүлүк жана ички суроо-талаптын жогорулашы түрткү болгон. Салыштыруу үчүн, октябрь айында ишкердик активдүүлүк индекси Орусияда 49,8, Казакстанда 46,4, Германияда 54,2 жана Кытайда 52,1 пунктту түзгөн", - деп белгиленди маалыматта.

Адылбек Касымалиев чакан жана орто бизнести колдоону күчөтүү, жеңилдетилген каржылоону өркүндөтүү жана ишкерлерге болгон административдик тоскоолдуктарды азайтуу боюнча тапшырмаларды берди.