Бир жумада 10 миңден ашуун учур... Өлкөдө сасык тумоо күчөдү

Оорулардын алдын алуу жана мамлекеттик санитардык-эпидемиологиялык көзөмөл департаменти курч респиратордук вирустук инфекциялардын (КРВИ), сасык тумоонун жана коронавирус инфекциясынын жайылышына жума сайын мониторинг жүргүзүүнү улантууда. Бул тууралуу бүгүн, 9-ноябрда Саламаттык сактоо министрлигинен билдирди.

Маалыматка караганда, 2-8-ноябрь күндөрү республика боюнча КРВИ жана сасык тумоонун 10 миң 900 учуру катталган. Бул көрсөткүч өткөн жумага салыштырмалуу 4,4 пайызга, ал эми 2025-жылдын ушул мезгилине салыштырмалуу 1,6 эсеге жогору.

"Ооругандардын жалпы санынын 71,1 пайызын 14 жашка чейинки балдар түзөт. Сезондук сасык тумоонун алдын алуу максатында Саламаттык сактоо министрлиги тарабынан «Гриппол+» вакцинасынын 63 миң 734 дозасы сатылып алынып, учурда эмдөө иштери жүрүп жатат",- деп белгиленди маалыматта.