Кыргызстанда алтын экспорттоо былтыркыга салыштырмалуу 49 пайызга кыскарды

Өткөн жылга салыштырмалуу быйыл Кыргызстанда алтын экспорттоо 49,9 пайызга кыскарды. Бул тууралуу бүгүн, 8-апрелде Улуттук банктын төрагасынын орун басары Заир Чокоев маалымат жыйында билдирди. “Бул жылдын январь-февраль айларында алтын экспорттоодон түшкөн сумма 48,3 миллион долларды түздү. Алтынды чет өлкөгө чыгаруунун кыскарышы февраль айындагы бул баалуу металлдын экспорттолбой токтоп калышына байланыштуу”,- деди Чокоев. Анын айтымында, кебезди экспорттоо 53,5 пайызга, кийим экспорттоо 22,6 пайызга, жашылча-жемиштерди экспорттоо 18,2 пайызга кыскарган.