Көк бөрү. Финал. Ынтымак (Талас) 8:7 эсеби менен Достукту (Ош) жеңип, чемпион болду

16:35. Оюн аяктады. Ынтымак (Талас) 8:7 эсеби менен Достукту (Ош) жеңип, "Нооруз-2017" көк бөрү боюнча мелдешинин чемпиону болду.

Айта кетсек, бул мелдешке жалпысынан 12 команда катышкан. 1-орунга 350 миң сом, 2-орунга 250 миң сом, 3-орунга 150 миң сом берилет.

16:19. 3-тайм соңуна чыкты. Оюн тең эсеп менен аяктаганына байланыштуу кошумча 10 мүнөт убакыт берилет.

16:13. 3-тайм болуп жатат. Азыркы убакытка карата эсеп теңелди: Достук (Ош) 7:7 Ынтымак (Талас).

15:53. 2-тайм соңуна чыкты. Бул убакыттын жыйынтыгы менен "Достук" 6:4 эсеби менен алдыда келе жатат.

15:50 Ат майданда адамдардын саны абдан көп. Ал жакта жалгыз гана Бишкек шаарынын тургундары эмес, атайын оюнду көрөбүз деп өлкөнүн бардык аймактарынан келген адамдар да бар. Болжол менен ат майдандагы көрүүчүлөрдүн саны 23 миңге чукул дешүүдө. Көрүүчүлөр улак тартыш оюну өтүп жаткан майданга чейин чыгып кетишти. Улакчылар атты башкара албай адамдарды тебелетип кетиши толук мүмкүн болгон абал түзүлүп жатат. Мындан улам Бишкек шаары, дегеле өлкө кенен жана заманбап ат майданга муктаж экени билинип турат.

15:46 Көк формачан оюнчулар Талас облусунун "Ынтымак" командасы. Ал эми кызыл кийимчендер Ош облусунун "Достук" командасынын оюнчулары. Учурда Оштун "Достук" командасы 1 ирет Таластын тайказанына улак таштады. Бирок абал талаштуу болуп жаткандыгына байланыштуу калыс ташталган упайды эсептөөнү чечүүдө.

Бүгүн, 21-мартта Бишкектеги "Аккула" ат майданында Нооруз майрамына карата көк бөрү боюнча мелдештин финалы өтүүдө. Азыркы тапта 2-таймда Талас облусунан келген "Ынтымак" командасы Ош облусунан келген "Достук" командасын 4:3 эсеби менен жеңип жатат.

Буга чейин көк бөрү боюнча 3-орун үчүн болгон оюнда Чүй облусунан келген "Сокулук" менен Талас облусунан келген "Мурас" кез келип, чүйлүктөр 9:3 эсебинде жеңип алган.