Арсен Венгер ФИФАнын президенти болууга талапкерлигин коюшу мүмкүн

Франциялык белгилүү машыктыруучу, “Арсенал” футболдук клубунун мурдагы башкы машыктыруучусу Арсен Венгер Эл аралык футбол федерациясынын (ФИФА) президенти кызматына талапкер болушу мүмкүн. Бул тууралуу L’Equipe басылмасы жазып чыкты.

Басылманын маалыматына караганда, Венгер жакынкы күндөрү президенттик шайлоого катышуу-катышпоо боюнча акыркы чечимин кабыл алышы керек. Анткени шайлоого катышууну каалагандардан арыздарды кабыл алуу 18-ноябрга чейин уланат.

Венгер 2019-жылдан бери ФИФАда футболду глобалдык өнүктүрүү боюнча жетекчи болуп иштеп келет. Ал уюмдун учурдагы президенти Жанни Инфантинонун мүмкүн болгон атаандашы катары каралууда.

Маалыматка ылайык, Европанын футбол жетекчилеринин айрымдары Венгердин талапкерлигин колдоого кызыкдар. Алар ФИФАнын жетекчилигине башка талапкерди сунуштоо мүмкүнчүлүгүн талкуулап жатышат.

Венгердин талапкерлиги тууралуу сөздөр ФИФАнын жетекчилигинде өзгөрүүлөр болушу мүмкүн деген талкуулар күчөгөн маалда пайда болду. Буга чейин ал Инфантинонун дүйнөлүк чемпиондукка байланыштуу коммерциялык долбоорун сынга алган. Венгер долбоордон баш тартуу туура чечим болгонун айтып, ФИФАнын көз карандысыздыгын жана ачык-айкын иштешин колдой турганын билдирген.

ФИФАнын президенттигине шайлоо 2027-жылдын 18-мартында Марокконун Рабат шаарында өтөт. Талапкер катары катталуу үчүн улуттук футбол ассоциацияларынын кеминде бешөөсүнүн колдоосун алуу зарыл.

Азырынча Венгер шайлоого катышары тууралуу расмий билдирүү жасай элек.