Өмүрбек Бабанов: "Мен Бакиевдин шайлоо алдындагы штабын башкарган эмесмин"

Бишкекте бүгүн, 15-октябрда президенттикке талапкер Өмүрбек Бабанов маалымат жыйын өткөрүүдө. Анда талапкер президент Алмазбек Атамбаевдин сөздөрүнө комментарий берүүдө.

"Көпкө чыдап келдим, президент Алмазбек Атамбаевдин мен тууралуу айткан сөздөрү толугу менен жалган. Атамбаев Бакиевдин тушунда премьер-министр болуп турганда мен бир мандаттуу округдан шайланган өз алдынча иш жүргүзгөн депутат болчумун. 2009-жылы Бакиевдин штабын жетектеген деп жатат. Мына колумда өкмөттүн токтому турат. Бакиевдин штабынын төрагасы Чудинов болчу. Мен ал командага бөтөн болчумун, экономикалык реформалар үчүн гана кошулгам. Шайлоо бүткөндөн кийин өз каалоом менен арыз жазып кызматтан кеткем. Мен убагында Бакиевге каршы митингдерди каржылагам, муну Бекназаров, Сариев, Шерниязовдон сурасаӊар болот", - деди Бабанов.

Эскерте кетсек, бүгүн добуш берүү тилкесинде журналисттер менен жолугушкан президент Алмазбек Атамбаев Өмүрбек Бабанов 2009-жылы Бакиевдин шайлоо штабын жетектеген деп айткан эле. "Ал убакта шайлоолор кандай өткөнү белгилүү", - деген өлкө жетекчиси.