Бишкекте 7 жана 9 айлык бөбөктөрдүн жөрмөлөө боюнча жарышы өттү (фоторепортаж)

Бүгүн, 3-ноябрда Бишкек шаарындагы соода борборлордун биринде 7-9 айлык ымыркайлардын жөрмөлөп жарышуу боюнча мелдеши өттү. Анда 55 ымыркай жөрмөлөп байгелүү орундар үчүн жарышты.

Мындай мелдеш Кыргыз өлкөсүнүн аймагында алгачкы жолу өткөрүлдү. Ымыркайларды атайын килемге коюшуп, алдынан атасы же энеси чакырып, фиништик марага чейин жөрмөлөттү. Катышуучулар 7 тайпага бөлүнүп, алдынкы 3 орунду ээлеген бөбөктөр кийинки этапка өтүп жатышты. Ата-энелер өз балдарын ар кайсы кызыктыруучу буюмдар менен чакырып жатышты. Айрым ата-энелер шар, таттуулар менен кызыктырса, көбү телефон, планшет жана ноутбук менен кызыктырып жатышты. Жакшы эле келе жатып орто жолдон ыйлап же башка жакка бурулуп кеткендер, алаксып жөрмөлөбөй отуруп алган бөбөктөр көрүүчүлөргө күлкү тартуулады.

9 айлык Жайсан Таштанбеков бардык этаптарда алдынкы орундарды ээлеп 1-орунга ээ болду. Аны фиништик марага атасы ээрчитти. Жайсандын атасы Максат Кайназаров анын жеңиши тууралуу "мелдеш абдан кызыктуу болду, биз буга чейин мындай мелдештерге катышып көргөн эмеспиз. Менин балам телефонго абдан кызыкканынан биринчи жана экинчи жолу ошол менен чакырып фиништик марага жеттик. Кийинки финалдык жарышта баламды шар менен алаксытып жеңип алдык. Бирок балам өзү мен чакырганда эле келет", - деп кубанганын жашырган жок.