"Баламдын көзүнө жана жүрөгүнө бир жылдан кийин операция жасалмай болду" дейт 2 көздүн ордуна шишик менен төрөлгөн ымыркайдын атасы

2 көздүн ордуна шишик менен төрөлгөн ымыркай Табаракты ата-энеси дарыгерлерге көрсөткөнү Оштон борборго алып келишкен. Атасы Асилбек Нуркамил уулунун айтымында, бала жүрөк кемтиги менен төрөлгөн. Азыр анын салмагы кичинекей болгондуктан операцияны көтөрө албайт. Мындан улам бир жылдан кийин гана жүрөгүнө жана көзүндөгү шишикти алуу үчүн операция жасалат.

"Элден айланса болот экен. Батирдин акысын төлөөгө акча таппай турганда, эл көтөрүп кетти. Кайрымдуулардын жардамы менен Бишкекке келип, балабызды да текшерүүдөн өткөрүп алдык. Табарактын 2 көзүндөгү шишикти азырынча алууга болбойт экен. Көзүнө жарык беришкенде ары-бери кыймылдатты. Ошондон улам кареги бар болушу мүмкүн деп божомолдоп жатышат. Уулумдун жүрөгүндө кемтик бар экен. Анан салмагы да кичинекей болгондугуна байланыштуу, дарыгерлер азырынча көзүнө да, жүрөгүнө да операция кыла алышпасын айтып, бир жыл күтүү керектигин билдиришти", - дейт Асилбек Нуркамил уулу.

Эске салсак, Асилбек Нуркамил уулунун 2 көзү тең көрбөйт. Ал үйлөнөрдө ден соолугунун мүмкүнчүлүгү чектелген кыз издеп, 2012-жылы Жазгүл аттуу кызга үйлөнгөн. Улуу кызы Хафиза ден соолугу чың төрөлгөн, бирок сүйлөө жагынан аксайт. 2-кызы Басиранын да көзү азиз. 3-баласы Табарак көздүн ордуна 2 шишик менен төрөлгөн. Оштон Бишкекке келип, баласын ооруканага көрсөткөнгө акчасы жок, кыйналып жаткандарын айтып Нуркамил уулу SUPER.KG порталына интервью берген.