Дарыгердин 5 миң сомго жетпеген маянасы тууралуу Улуттук госпиталь үн катты

Социалдык тармакта Улуттук госпиталдын дарыгери Элзар Токтоназаровдун 5 миң сомго жетпеген маяна алганы кызуу талкууну жараткан. Бул окуя боюнча Улуттук госпиталдын башкармалыгы төмөнкүлөрдү билдирди.

"Дарыгер Элзар Токтоназаров 2015-жылдын 1-апрелинен тарта 2018-жылдын 1-февралына чейин бир жарым ставкада (бир ставка методист, жарым ставка ангиохирург), ал эми 2-февралынан тарта өз каалоосу менен жарым ставкада ангиохирург кызматына өткөн. Мунун себебин ал "башка жумуштарым бар" деп түшүндүргөн. Дарыгер коомчулукка көрсөткөн эсеп кагаздагы сумма жарым ставка үчүн эсептелген маяна. Ошондой эле жарым ставкада иштеген дарыгерлердин күндүзгү иш убактысы 3 саат 25 мүнөттү түзөт. Ал эми түнкү үбактысы 16 саттан 4 нөөмөткө коюлат. Элзар Токтоназаров бир жарым ставкада иштеп жүргөндө эч качан көрсөтүлгөндөй маяна алган эмес", - деп айтылат Улуттук госпиталдын башкармалыгынын маалыматында.

Кыргыз Республикасынын Саламаттыкты сактоо министрлигине караштуу Улуттук госпиталда толук ставкага иштеген дарыгерлердин айлыгы 5 миң сомду түзүп, "Улуттук" деген макам үчүн кызматкерлердин маянасына миң кошулат. Медицина тармагында кызмат кылган жылдары үчүн кошумча төлөм 5 жыл иштесе 10 пайыз, 10 жыл иштесе 20 пайыз, 15 жыл болсо 30 пайызды түзөт. Эмгектин өзгөчө шарты үчүн кошумча төлөмдөр бөлүмдөгү жумуштун шартына жараша төлөнөрүн кошумчалады.

"Хирургиялык бөлүмдүн кызматкерлерине 15 пайыз хирургиялык профиль үчүн төлөнөт. Категория, илимий наамдар үчүн (экинчи категория 10 пайыз, биринчи категория 20 пайыз, жогорку категория 50 пайыз) төлөнөт. Дарыгер Элзар Токтоназаров азыркы тапта медицина тармагында иштегенине 5 жыл боло электигине байланыштуу кошумча төлөм албайт. Ошондой эле ал иштеген бөлүм өзгөчө шартта иштеген бөлүмдөрдүн катарына кирбейт. Эч кандай категориясы, илимий наамы да жок", - деп кошумчаланат маалыматта.

Буга чейин социалдык тармактарда врачтын колго тийген 5 миң сом маянасы кызуу талкууланып жатканы жазылган.