"Ош базарында" адегенде күйөөмдү, эми 7 миллион сомдон ашуун товарымды жоготтум" дейт соодагер

13-апрелге караган түнү "Ош базарында" катталган өрт кырсыгынан базардагы сатуучулар миллиондогон чыгым тартышты. Алардын айрымдары базар тилкесин ижарага алып, иштетип келишкен. Эң көп чыгым тарткан Алтынай Асаналиева 7 миллион сомдон ашуун зыян тарткан.

"Контейнерди ижарага алып, айына 60 миң сом төлөп иштетчүмүн. Базарда тумак, шуба сатчумун. Менин товарларым базардагы эң кымбат товарлар болчу. Бери жагы дегенде эле 7 миллион сомдон ашуун товарым күйүп, күл болуп кетти. Соода жүргүзүү үчүн үйүмдү күрөөгө коюп, банктан насыя алгам. Эми ал акчаны кайдан таап берем? Насыямды кантип төлөйм? 3 балам менен көчөдө калдым", - дейт ал.

Ошондой эле жабырлануучу жолдошу да мурда ушул жакта соода кылганын, 40 күн мурун бирөө менен уруша кетип, баш мээсине кан куюлуп каза болгонун айтып, төмөндөгүлөрдү билдирди: "Мен жалгыз бой энемин, жаңы эле күйөөмдөн айрылып, кайгыга батып турганда минтип кырсык болуп жатат. Эртең эле насыя алган банктар келип үйүмдөн чыгуумду талап кылышат, анда кайда барам билбейм. Жолдошум жанымда болсо мынча кыйналбайт белем".